‘Mi a kaba mi estudio na Newbold College. Mi tabatin un diploma di teologia den mi saku, i mi a hasi algun estudio postdoktoral tambe. Despues mi a bai solisitá pa un trabou komo pastor. A ofresé mi pa kuminsá traha komo obrera bíblika. Den e tempu ei no tabatin diferensia den ser un obrera bíblika i pastor. Ku orguyo di hubentut mi a bisa: “e ta tur kos òf nada.” Mi a bira lomba i kana bai laga un trabou komo obrero pa iglesia. Si mi lo tuma mes un desishon awor aki? Mi no sa. Ma ta esei mi a hasi e tempu ei.’
Teksto for di redakshon
Ta kla pa mira ku pastor Audrey Andersson su karera den iglesia no a sigui e forma normal. Ps. Andersson ta traha komo sekretario general na e kantor prinsipal Oropeo. Esaki ta nifiká ku e ta okupando un di e puestonan mas haltu den iglesia na Oropa. For di su funshon e ta perkurá pa iglesia funshoná bon na Oropa. E tin un empleo variá, ku gran responsabilidat. Entre nan e ta esun ‘enkargá ku dokumentashon, e ta vigilá si ta sigui maneho i proseduranan, i ta intervení generalmente ora tin problema, i naturalmente ta duna entrenamentu pa iglesia por funshoná mas efisiente ku ta posibel.’ Ps. Andersson ta parti di djis un man yen di dirigentenan femenino ku ta haltu den iglesia mundial. E ta kompartí su eksperensianan i tambe algun desafionan den iglesia ku nos.
Mundu di hende hòmber
Ps. Andersson a kibra e ‘plafònt di glas’ di atventismo, pero e ta traha den un mundu maskulino. E ta duna un impreshon kon tabata pa kuminsá traha komo hende muhé na tòp. ‘Mi’n tabata sabi kiko mi mester a spera ora ku mi a bira sekretario general. Pero e uniko kos ku mi a ekspe-rensiá tabata aseptashon i hospitalidat. Na e promé reunion general mundial ku mi a asistí, mi a mira hende pensando den nan mes: “Ta ken e muhé ei ta?” Pero en general hende tabata hasi hopi esfuerso pa laga mi sinti bon bini. Te na tòp, inkluyendo presidente mundial pastor Wilson.’
E ròl di hende muhé den iglesia ta un heru kayente den último añanan. Den hopi reunion e pregunta ta bin padilanti komo punto di agènda si hende muhé tin mag di traha pa iglesia, i si ta asina, kon? Ounke e no ta un ingles, e ta bisa ku un ‘understatement’ típiko britániko kon e tabata sinti durante e diskushonnan aki. ‘Ora tabatin diskushonnan fuerte tokante ròl di hende muhé den kantor mundial, eseinan no tabata e momentunan mas agradabel pa mi. Pero regularmente sa sosodé ku un par di e oponentenan mas fuerte di pastornan femenino ta bini serka mi e dia siguiente pa bisa mi ku nan no tabata referí na ami. Ora hende konosé bo personalmente, henter e asuntu ta kambia.’
Bringa pa derecho di hende muhé
Ps. Andersson no ta konosí komo un hende ku ta bin dilanti pa defendé ròl di hende muhé den iglesia. Tempu e tabata mas hoben, esei tabata diferente. ‘Mi no tabata trahando pa iglesia, pero mi tabata hopi envolví. Un biaha sabat mainta mi tabatin un charla tokante ròl di hende muhé den iglesia. Mi a bisa ku no tabatin ningun hende muhé den direktiva na Inglatera, kaminda mi tabata biba, òf na e ofisina prinsipal Oropeo. Un di e hende muhénan ku a tende esaki, a tuma esaki komo krítika riba iglesia. El a rabia masha pisá ku mi. Realmente hende mester a ten’é sino e lo a ataká mi físikalmente. For di e dia ei mi mester a pensa masha duru. Mi a hasi mi mes tres pregunta: Mi ke sigui ku algu ku ta duna otronan asina hopi doló? Mi aktitut ta stroba mi sigui ku mi trabou (boluntario) pa Señor? Mi ke pa e asuntu di hende muhé aki determiná ta ken mi ta? Mi a yega na e konklushon ku, ounke mi punto di bista no a kambia, miho mi no sigui papia di e asuntu aki. Na lugar di esei mi kier a duna un ehèmpel dor di mi komportashon.
Den su tarea aktual te ainda Ps. Andersson ta e ehèmpel ei. Dor di esaki e por relashoná i sigui traha ku hopi hende ku no ke mira hende muhé den puestonan di liderasgo. ‘Hende ta konvensí di esun kos òf e otro. Bo no por pone nan kambia di pensamentu tòg. Mi ta komprondé i respetá hende ku ta pensa diferente. Mi ta bisa gewoon: “Okei, ta bon, pero at’ami aki. Asina nos tinku pone nos opinion un banda i sigui traha huntu”.’
Traha pa iglesia
Ps. Andersson no tabata ke ta un obrera bíblika i a bai buska un trabou pafó di iglesia. ‘Vários aña mi a traha komo redaktor hurídiko pa un revista. Mi tabata duna un notisiero diario na sala di korte na Londen. Mi a duna guia na un tim di binti abogado ku un presupuesto di hopi mion di pònt. Despues mi a topa un kabayero Suiso. Nos a kasa i mi a muda bai biba na Suisa. Sinku aña mi a sigui traha na Londen, biahando ariba abou, i despeus mi a kuminsá ku mi mes kompañia di komunikashon na Suisa. Te ora ku, inesperá e presidente di iglesia Atventista na Suisa a yama mi na telefon ku e pregunta si mi ke bira sekretario general pa iglesia na Suisa. Mi a hari. Mi a bisa ku e no mester hasi straño asina. Mi tabata konosé bon i mi tabata konvensí ku e kier a hasi un wega. “No”, el a bisa, “mi ta serio.”
Mi a puntra Dios den orashon si mi por a hasi algu p’E. Mi tabata dispuesto pa traha part time p’E, te maksimal 50%. Pero e trabou aki no tabata loke mi tabata ke men. E presidente a bisa: “No preokupá, e ta djis part time.” Pero masha lihé el a bira full time. Señor tabata sabi ku nunka mi lo a bisa si pa un trabou full time!’
Na aña 2010 ps. Andersson a risibí un otro yamada di telefon. E biaha aki for di e presidente di kantor prinsipal Oropeo. “’Bo ke bira sekretario di iglesia mundial?” el a puntra. “Aki dies minút mi mester di bo kontesta.” Pa tuma e desishon a dura mi dos ora. Mi a papia ku mi kasá. El a haña e asuntu hopi simpel: “Bo no por bisa nò”, el a bisa. Mi a realisá ku e petishon aki tabata asina inesperá i asina eksepshonal, ku e mester ta Dios Su man obrando. Nunka antes tabatin un sekretario hende muhé na un kantor prinsipal regional di nos iglesia.’
Dios ta yama, nos ta kontestá
Ora e wak bèk riba su karera pa Señor, ta masha kla pa ps. Andersson. ‘Dios a yama mi. No tin duda di esei. El a guia mi i a duna mi e eksperensia ku tabatin mester pa e trabou ku mi ta hasiendo p’E awe. Mi tabatin un bon bida tempu mi tabata traha pafó di iglesia. Mi tabata gana mas sèn, mi tabata hasi trabou ku mi tabata gusta. Awor aki e bida di mi i di mi kasá ta mas kompliká, pasobra nos tur dos ta bibando den un otro pais. Mi ta kaminda mi ta pasobra Señor a yama mi. Si Dios a yama ami, E ta yama otro hende muhé tambe. Esei no por ta otro. Dios no ta entregá. Ora mi papia ku hende muhé, semper mi ta bisa: “Skucha na bo yamada.” Na atventistanan lo mi ke bisa: “Rèspèta hende muhé pastor. Nan ta boso ruman den fe.” Hopi hende muhé pastor ta desanimá. Desafortunadamente nos ta mira tambe ku algun miembronan ta trata nan den un forma ku no ta nada kristian. Esaki ta inaseptabel. Komo iglesia nos tin ku sostené pastornan den nan trabou, no importá ki sekso nan ta.’
Futuro
Ora a puntr’é tokante futuro di hende muhé den ministerio pastoral, ps. Andersson ta bisa: ‘Ta masha kla ku ami nunka lo a bira sekretario di kantor prinsipal, si mi no tabata traha na Suisa. Einan nunka nan no a deliberá tokante mi sekso. Otro paisnan no ta dje leu ainda. Nos mester tin pasenshi, pero futuro ta kla nos dilanti. Hende muhé ta hunga un ròl aktivo den sosiedat i nan ta hunga un ròl aktivo den iglesia. Iglesia i sosiedat ta reakshoná riba otro. Kambio lo bini.’
Dit artikel werd gepubliceerd in Advent 3, 2016.
