Komo mucha, ku a lanta den añanan nobenta, semper mi tabata keda fasiná ku e desaroyonan mas grandi, mas lihé i mas impreshonante den téknika moderno. Edifisionan di hopi piso, outunan deportivo rápido, tènkernan mamut, mi’n tabata kansa di wak nan. Pero tabatin ún favorito: e Kònkòrt.
Teksto ds. Tom Meijer
Imaginá bo: di London pa New York den 3,5 ora, riba un altura di 18.300 meter i ku un velosidat inkreibel di 2.180 km pa ora. Dor di e krusada haltu di e avion e pasaheronan por a mira e forma rondó di tera. I kisas e kos mas fasinante di tur lo tabata, ku dor di e diferensia den tempu, e hendenan tabata yega mas tempran na New York ku e ora ku nan a sali for di London. Den poko palabra, hopi impreshonante.
For di suela
E Concorde a bin na eksistensia dor di un koperashon Ingles- Franses. Tur dos gobièrnu a hinka hopi sèn aden pa lanta e proyekto aki literalmente i figurativamente for di suela. For di komienso tabatin algun di tim di e proyekto ku a kuminsá ekspresá algun preokupashon kaba. E pregunta tabata si e lo bai bira rèndabel komo un servisio na pasahero. Loke tabata no ménos importante, ta e enorme daño ku e avion aki lo bai kousa posibelmente na e medioambiente.
Esaki i vários otro duda mas tabata hopi tempu kaba konosí serka e diferente órganonan ku mester a tuma e desishon, promé ku e promé vuelo a tuma lugá. Ma a pesar di esei, a skohe tòg pa sigui ku e proyekto. Ya a yega asina leu kaba—piká pa bai laga tur kos para awor, nan tabata pensa. Al final, despues di 28 aña di servisio, tur dos pais na aña 2003, a disidí ranka stèker saka afó numa, dor di un kombinashon di preis di kombustibel ku tabata subi, un desaster di avion den besindario di Paris na aña 2000 i e atakenan terorista di 11 sèptèmber. Na tur tabatin un pèrdida di 1,3 miar pònt ku e proyekto aki. E lo a spar e pagadónan di belasting Ingles i Franses hopi sèn, si e gobernantenan responsabel a skucha for di prinsipio na e preokupashonnan ku tabatin, i a para e proyekto for di anterior.
Engaño sutil
E manera di pensa robes, kostoso aki, a bira asina konosí ku tin asta un palabra p’e: ‘e engaño Concorde’, ku un palabra un poko mas neutral: ‘e engaño hundí di gastu’. E ta enserá ku nos komo hende en general, tin difikultat pa laga lòs na kosnan ku nos a hinka hopi tempu òf sèn den dje. Esaki ta konta pa kosnan hopi simpel manera wak un pelikula hopi malu, miéntras ku mitar den dje nos por a skohe pa wak un otro. Of un restorant all-you-can-eat kaminda nos ta pròp yena nos mes, pasobra nos tin e sintimentu ku di otro forma nos no ta haña nada bèk na balor di nos sèn. Hopi biaha nos ta haña di esun último ei hopi duele algun oranan despues.
E engaño Concorde tin tambe influensia, sinembargo, riba eskohonan hopi serio ku nos ta hasi den nos bida. Un kambio di karera òf direkshon di estudio ta hopi biaha un desishon drástiko, pero tin biaha nos ta hasi’é mas difísil pa nos mes, dor di konsiderá ku tur e tempu i energia ku nos a hinka den nos karera aktual, ta un pèrdida. Miéntras ku e uniko tempu ku bo por pèrdè realmente ta e tempu futuro, i no esun ku a pasa kaba!
E por evitá tambe ku bo por haña bo mes den un relashon di trabou, amistat, òf namoramentu ku no ta bon pa bo. Tòg tin biaha ta hopi duru pa laga lòs, pasobra tur e tempu ku boso a pasa huntu, bo ta sinti’é e ora ei komo un pèrdida. Ora nos ta asina leu, mayoria di nos no ta gusta entregá, laga lòs. Di un forma òf otro e ta hasi doló. E sintimentunan aki ta hopi normal i bo’n tin mester di sinti bèrguensa di nan; asta e hendenan sabí i bon studiá di e proyekto Concorde a kai p’é.
No bon òf malu
Den Beibel nos ta topa tambe un persona ku a hañ’é dilanti un desishon hopi serio. Amasias ta un di e reinan di Huda ku nos no ta tende hopi biaha di dje òf lesa di dje. Beibel ta bisa lo siguiente di dje: ‘Amasias a hasi loke tabata bon den bista di Señor, pero no di henter su kura-son’ (2 Kronikanan 25:2). E no tabata kompletamente mal hende, manera hopi di su antepasa-donan i desendientenan, pero e no tabata masha ehemplar tampoko.
Den tempu di Amasias e reino di Huda tabata na pia di guera ku otro paisnan bisiña. Den 2 Kronikanan 24 nos ta lesa ku Huda a sufri un gran derota na man di e Arameonan. Amasias no tabatin intenshon pa laga esei tuma lugá un biaha mas. E kier a duna honor na su nòmber i el a reuni un ehèrsito enormemente grandi huntu: en total 300.000 guerero itrein ku por a usa lansa i eskudo’ (2 Kronikanan 25:5).
Delirio di grandesa
Amasias, sinembargo, tabatin problema ku delirio di grandesa i a haña ku tabata un bon idea pa hür 100.000 hòmber mas pa fortalesé su armada. E hòmbernan aki el a buska serka su bisiñanan, e reino nort di Israel. El a paga pa esaki un suma di shen talento di plata, ku kalkulá ta sali banda di 55 mion euro. E tabata un invershon gigantesko, pero en realidat un suma chikitu si nos kompará esei ku e presupuestonan aktual di defensa, asta di un pais asina chiki manera Hulanda. En realidat e tabata un preis abou si bo por fortalesé di e forma ei bo pais i trese libertat i pas.
E rei aki di Huda lo mester tabata hopi orguyoso di su armada ku tabata konta na tur 400.000 hòmber. Nos no ta mira ehèrsitonan mas grandi ku esei den Beibel, pero Señor no tabata orguyoso di dje manera Amasias! Señor no por a aseptá ku Amasias a añadí Israelitanan for di e tribunan di nort na su ehèrsito, pasobra e hòmbernan aki no tabata sirbi Señor komo nan úniko Dios. Un profeta a bini serka Amasias pa bis’é ku e mester laga e 100.000 hòmbernan ei bai, sino Dios ta retené Su bendishon for di tur e forsanan armá.
Eskoho krusial
Awor Amasias a hañ’é dilanti un eskoho krusial. En realidat e ta hopi simpel, pasobra e tabatin dos opshon akinan: e por a laga e 100.000 hòmbernan ku el a hür bai, pero dor di esei e lo pèrdè e 55 mion ku el a invertí. E e por a ranka sali bai guera sin e bendishon di Señor, ku sin duda lo a nifiká un derota. Asina e motibu di Concorde ta bin lur atrobe rònt di skina. Asta e tempu ei hürdónan no tabata atendé bon ku asuntu di duna sèn bèk, asina e rei a pèrdè e 55 mion ei. Si Amasias, sinembargo, a perseverá den su empeño pa bai guera ku e 400.000 na lugá di 300.000 so, probablemente e lo a pèrdè tur kos!
Al final Amasias ta disidí sigui konseho di e profeta. Dor di e desishon aki Amasias a gana e bataya importante ku a sigui i e reino di Huda tabatin pas temporalmente. Amasias a skohe pa sufri pèrdida numa di su invershon, pa gana ku esei e bendishon indispensabel di Dios. Lamentabelmente, mes un rei aki poko tempu despues a kai rápidamente den idolatria. Ta trata anto di ún desishon sabí for di un rei ku finalmente no tabata dje sabí.
Filosofia i fe
Awor lo bo ta pensa ta kiko e kombersashon filosófiko aki tokante un engaño sutil tin aber ku fe. Kisas bo no ta imaginá bo mes den e ehèmpelnan presentá den e artíkulo aki. Ami, sin-embargo, ta konvensí ku fe ta un asuntu di kabes i kurason. Solamente tin biaha nos kabes i nos kurason no ta di akuerdo ku otro. E ora ei ta bon pa di bes en kuando para ketu, i skrudiñá kua ta e rasonnan di esaki. Pablo ta bisa den Romanonan 12:2 ku nos mester renobá nos pensamentu. Ami ta kere ku esaki ta un proseso kontinuo.
Ta bon pa konsientisá nos mes di esei, ku komo hende, tin biaha nos ta pensa robes. Ekiboka-shonnan tin un impakto negativo riba e eskohonan ku nos ta hasi diariamente, i a lo largo tambe riba nos fe. Mi ta spera ku nos tur por bira un poko mas konsiente di nos mes eskohonan. Asina nos por bira mihó mayordomonan di nos tempu i sèn. Ta hopi bon pa sabi ku sufri pèrdida, entregá i laga lòs, ta hopi biaha e kos di mas mihó ku nos por hasi. Pa kontradiktorio ku e por zona, i ounke bo por sinti ku e ta robes: tin biaha pèrdida ta al final ganashi.
