Iglesia Atventista ta konosí pa su mensahe di salut. Mundialmente iglesia ta bon representá den e instansianan di salubridat i hòspitalnan; salubridat ta man drechi di e mensahe atventista. Ds. Reinder Bruinsma ta investigá historia di e instansianan aki di salubridat i ta señalá un kapítulo nobo den e desaroyonan.
Teksto ds. Reinder Bruinsma
E esposo di Ellen White, James White, a haña un atake serebral na 1865. Pa e motibu ei huntu ku su kasá el a bai biba na Our Home on the Hillside na Dansville, New York, pa revalidá. E Whitenan a keda impreshoná pa e manera di traha di dr. James C. Jackson, fundador di Our Home, dor di lesa artíkulonan i dor di un bishita korto anteriormente na su instituto. Dr. Jackson tabata forma parti di un kantidat kresiente di reformadónan Merikano den aria di salú den e segundo mitar di siglo djesnuebe, ku tabata propagandá métodonan natural pa kurashon, manera por ehèmpel kuro di awa i alimentashon mas saludabel. Esaki a hala hopi atenshon pronto den e komunidat chikitu atventista, espesialmente pasobra hopi ‘pionero’ dor di agotamentu a haña nan mes ku problemanan serio di salú.
Tema di salubridat
E eksperensianan den Our Home on the Hillside tabatin un influensia importante riba Ellen White. ‘Salubridat’ a bira un tema ku a tene okupá durante henter su bida largu. Di bèrdat el a risibí inspirashon for di kontakto ku reformadónan di salut di su tempu, i a lesa hopi di loke nan a skirbi. Pero espesialmente algun vishonnan ekstenso, korto tempu despues ku el a biba na Dansville, a mustr’é e direkshon den reforma di salut. E menshon Ingles aki pa reforma pro salut a bira entretantu un konsepto i pronto lo haña un tèrmino rápido den iglesia Atventista.
For di final di añanan 1860 Ellen White tabata ketu bai kohe pèn pa apoyá e tema di reforma pro salut. Hopi biaha por mira e relashon kla ku tabatin entre loke e tabata skirbi i tur sorto di fuente di su tempu—kua no ta nada strañu, pasobra Ellen White no tabata biba den un vaccuüm. Ma riba hopi punto e tabata, no solamente, fia algun idea di otronan, pero e tabatin krítika tambe di e opinionnan di Jackson i koleganan di su tempu, i e tabata duna su mes opinion. Komo pionero si den e aria ei por mira kon el a konektá kuido di nos salú ku fe i religion i ku mayordomia kristian.
E komienso
Na 1866 Ellen White a mira den un vishon ku Atventistanan mester establesé un instituto propio, kaminda por apliká su vishon riba e tereno di reforma di salú. Algun lunanan mas despues esaki a hiba na lantamentu di Western Health Reform Institute. Despues di un komienso hopi basilante e institushon aki a krese i bira e famoso Battle Creek Sanitarium kolosal, kaminda John Harvey Kellogg tabata dirigí for di aña 1876. Kellogg, ku tabata un protegido di famia White, tabata den hopi aspekto genial. Pero den algun aspekto e tabata tambe ekséntriko, i terko. Segun e instituto na Battle Creek, den e estado di Michigan, tabata kresiendo, Kellogg a bai operá mas independientemente. E realidat ei, i su supuesto ideanan pantheísta, a hiba al final na aña 1906 na un kiebro entre ‘e dòkter’ i iglesia. Esun ku bishitá Battle Creek awor aki, ta mira te ainda algun edifisionan enormemente grandi, ku un ten tabata parti di e Sanatorio di Battle Creek, ku ta wòrdu usá awor dor di gobièrnu Merikano. Pero e bishitante siguramente ta keda impreshoná pa e enorme fábrikanan kaminda ta traha cornflakes di Kellog’s i produktonan relashoná kune. Will Keith Kellogg, un ruman hòmber di John Harvey Kellogg, tabata fundador di e emperio ei di cornflakes.
Bai California
E promé instituto di salubridat atventista na California, kaminda atventismo poko poko a kuminsá kohe rais, tabata e Rural Health Retreat. E promé pashèntnan a yega na aña 1878. E instituto aki den parti nort di e estado di California, banda di 200 kilometer for di San Francisco, a haña e nòmber nobo di St. Helena Sanitarium. Ora Ellen White, mas despues den su bida, a bai biba na California, el a urgi e lidernan di iglesia pa traha tres instituto mas di salú. Na su insistensia inkansabel ta debe ku denter di korto tempu a bini tres instituto paresido mas aserka. Danki na su vishon i un gran kantidat di donashonnan inesperá, na aña 1905 a bini un instituto den besindario di Los Angeles, ku awor tin e nòmber Glendale Adventist Medical Center. Durante mes un tempu ei —no sin hopi problema konsiderabel—e Paradise Valley Sanitarium, na parti sùit ost di San Diego a bin habri su portanan. Te na 2007 el a keda eksistí komo e Paradise Valley Hospital.
Loma Linda
Sinembargo, e aventura mas grandi di fe atventista riba tereno di salubridat tabata e proyekto di Loma Linda. Den e stat chiki ku e nòmber ei na parti sùit di California, banda di 150 kilometer for di Los Angeles, a habri un ‘sanatorio’ na aña 1905. Pronto a konektá un estudio médiko na dje. Awor, shen aña despues, Loma Linda University i Loma Linda Medical Center ta e ‘kabainan di parada’ di e iglesia Atventista di Shete Dia. E hòspitalnan di e sentro aki tin mas ku 1000 kama i ta trahando awor banda di 14.500 hende na Loma Linda. E sentro médiko aki a risibí espesialmente hopi publisidat na aña 1984 ku Beibi Fay, ku ta un beibi ku nan a implantá kurason di un makaku den dje. For di 1990 Loma Linda ta famoso pa tratamentu di kanser di prostat ku e asina yamá terapia proton, ku pronto a atraé hopi pashènt for di henter e pais i pafó di dje.
Un patronchi
Ora ku atventismo a kuminsá plama rònt di henter mundu, a sigui mes un patronchi fiho. Hiba e ‘evangelio’ a bai kompañá por lo general ku fundamentu di skolnan, imprenta/ kasnan di publikashon i instansianan di salubridat. Segun e buki di aña di iglesia Atventista di e aña 2015 tin rònt parti mundu 193 hòspitalnan i ‘sanatorionan’ atventista, banda di 160 otro instansianan mas den kuido, manera kasnan di kuido pa ansianonan i orfanatorionan, i banda di 300 klínikanan. Globalmente por repartí e hòspitalnan den dos kategoria. Promé e hòspitalnan den mundu oksidente òf hòspitalnan otro kaminda den mundu ku ta operá kompletamente segun sistema di oksidente. I na di dos lugá tin hopi biaha instansianan mas chiki den paisnan den desaroyo, ku ta ofresé kuido básiko na lugánan alehá kaminda no tin nada di kuido médiko.
Kuido ekselente
Loke ta trata e promé kategoria, e ta trata hopi biaha di instansianan hopi grandi kaminda ta presta kuido ekselente kualitativo, ku tur fasilidat moderno di teknologia moderno. Por haña esakinan no solamente na Norte Amerika, pero tambe den algun paisnan Sur-Amerikano i na lugánan manera Bangkok, Saigon i Sydney. Na Oropa hopi hòspital atventista, mester a sera nan portanan pa tur sorto di rason. Hopi na Skandinavia, tin grabá ainda fresku den nan memoria e dekadensia dramátiko na 1992 di e lugá ekstenso di kuido i tratamentu médiko nort di Kopenhagen, Skodsborg Badesanitoriu.
E úniko hòspital ‘real’ di iglesia na Oropa ta esun aktual Krankenhaus Waldfriede den suburbio di Berlin. E hòspitalnan den e kategoria aki ta independiente finansieramente. Hopi biaha ta kosta hopi sakrifisio i esfuerso pa mantené e identidat atventista, pasobra kasi tur pashènt no ta miembro di iglesia Atventista i mayoria persona ku a tuma den servisio ta di pafó di iglesia.
Mayoria di e instansianan di e segundo kategoria, mayormente den terser mundu, ta kai ainda bou di e nòmber ‘mishon médiko Atventista’. Nan tin mas tantu biaha problema finansiero pa kumpra sufisiente ekipo i atraé bon personal. Pero e trabou ku nan ta hasiendo einan ta keda te ainda hopi importante. E ta forma ainda un ilustrashon hopi konkreto di e slogan bieu atventista ku e trabou di salubridat ta man drechi di e mensahe atventista!
Kapítulo nobo
Den vários pais di oksidente por haña individuonan atventista, òf grupo di miembronan ku ta wak e asuntu di mes un manera, i nan ta puntra si e tempu no ta hechu entretantu pa redeskubrí pasado. Nan ta averiguando si por ofresé den nan besindario, no solamente métodonan aktual di kurashon, pero pa desaroyá tambe inisiativanan nobo, usando e sistema natural di kurashon ku a keda desaroyá den siglo djesnuebe i di kua nan ta bolbe deskubrí su balor. Siguramente ta bale la pena pa kontinua ku e desaroyonan aki! E por bira un kapítulo nobo eksitante den e historia di lantamentu i kresementu di e ret mundial atventista di instansianan di salut.
Ds. Reinder Bruinsma ta un pastor profesor di iglesia Atventista. E ta miembro di hunta di redakshon di Advent i @vent.
