Kuido no ta un sektor próspero mas na Hulanda. Nan ta ripará esei tambe na Sentro di Kuido Vredenoord, ku ta e kas di kuido di iglesia Atventista. E kas ta hañ’é ku desafionan den atministrashon i den finansa. Tòg asina kos ta bai basta bon, kompará ku otro instituto. ‘Nos ta un koredó di maratòn ku kada bes di nobo ta logra yega e finish.’
Teksto Lydia Lijkendijk
Sentro di Kuido Vredenoord tin ún hende den Konseho di Atministrashon. Esei ta Paula Koeweiden- Cane Tuppen. El a tuma for di aña 2002, tempu ku ainda e tabata tesorero di iglesia Atventista, e funshon part-time, i na aña 2004 el a aseptá ofishalmente pa hasi e trabou ei. Verano benidero e ta tuma despedida: ‘Mi fecha a vense.’ Koeweiden (68) por dependé di un tim di maneho, i di Konseho di Supervishon, pero hopi biaha e ta su so pará dilanti tur kandela kayente ku ta enserá kuido awendia. Ofishalmente e ta biba na Woudenberg, pero por hañ’é kasi di dia i di anochi na Vredenoord. I ora e ta na kas, hopi biaha e ta trahando pa Vredenoord, kaminda e ta tambe gerente di lokalidat. ‘Nos ta muchu chiki pa un Hunta di Maneho fulltime, miéntras ku internamente bo mester di un persona ku ta guia tur kolaboradó. Mi konseho pa esun ku ta sigui ta: parti e funshon den hasi trabou di gerente di lokalidat fultaim, anto dos te tres dia dediká na e Hunta di Maneho pa asuntunan stratégiko.’
Stashon final
A pesar kon agitá e trabou ku e ta hasi ta, Koeweiden ta haña ku tòg e tin un trabou hopi bunita. ‘Mi trabou ta variá, nunka e ta laf. Mi tin di atendé ku dòkternan, otro speshalistanan, habitantenan di e kas di kuido, nan famianan, boluntarionan, i trahadónan. Mi trabou ta tokante hende ku ta bai deskansá, i nan ke sera nan wowonan na pas. Nos t’ei ora e hendenan rekòrdá e bida ku nan tabatin, nan relahá, i mira ku e tabata bon. No tin nada mas bunita ku esei.’ Vredenoord ta kompañá hende ku a yega na fin di nan bida, i pa hopi di nan esaki ta e stashon final. ‘Tempu ku mi a bin akinan, tabata diferente’, Koeweiden ta bisa. ‘Na 2002 nos tabata un kas di ansiano. Hende tabata bin biba akinan ora nan hasi 65 aña. E tabata meskos ku un lugá di fakansi. E kuminda tabata organisá i dos bes pa aña nan tabata bai keiru ku bùs. Ami mes tabatin tempu pa tene bon kombersashon ku hendenan ku mi a bin siña konosé hopi bon, pasobra nan a keda largu. Pero awor, pa mas tempran, e hendenan ta bini ora nan tin 85 aña, hopi biaha nan ta demènt. Mi tin un kontakto kompletamente diferente ku e habitantenan aki, ku mas o menos ta bai deskansá despues di un aña i mei. E hendenan ta hopi avansá promé ku nan bin serka nos. Nos no ta un kas di ansiano mas, pero nos ta ofresé mas i mas kuido di ‘hospita.’
Preokupashonnan
Riba e pregunta kiko ta kous’é preokupashon den e aria di su profeshon, ku ta kuido, Koeweiden ta bisa: ‘Denter di tres aña gobièrnu a oumentá e peso di kuido, miéntras ku nos personal tabata konsistí ainda parsialmente di esnan ku ta kuida di ansianonan i esnan ku ta kuida pa hende ku ta malu. Kon mester kuida pa e pashèntnan hopi mas grave?’ No ta semper rekapasitashon ta e solushon, Koeweiden sabi esei, pasobra no ta tur hende por sigui studia. ‘I personal ku si ta kapasitá, ku tin bon edukashon, ta duru pa haña. Na otro kaminda den Hulanda, ni den lugánan ku ta duna kurso, niun kaminda tin sufisiente hende ku ta duna kuido i enfermeronan. E lucha pa haña sufisiente personal kwalifiká, ta e parti mas fèrfelu di mi trabou. Mester tin un kolaborashon intensivo ku enseñansa, pa asina por tin kursonan kòrtiku pa entrená hende ku ta duna kuido i enfermeronan, pa por ofresé nan den e sektor di kuido di ansiano.’ Pa su parti por usa refugiadonan ku ta buska trabou por yuda den e aria ei. ‘Nos trahadónan i boluntarionan ta bini for di tur pais, asina esei no ta stroba nos, ounke e lenguahe por ta un gran problema. Nos ta lucha ku kasnan konkurente pa haña hende pa traha pa nos. Mi ta purba ta kreativo den mi manera di logra haña nan, pero ora no por otro, mi mes ta duna un man yuda. Mi no a wòrdu entrená pa traha den kuido, pero mi por drecha kama, i kolekshona paña pa bai laba.’
Peso atministrativo
E eksigensianan atministrativo ku kada bes ta bira mas i mas ta duna mas preshon ainda. ‘Kada kùp di margarina mester tin steker i wòrdu kontrolá’, Koeweiden ta suspirá. ‘Nos ta gasta hopi sèn na kosnan ku no tin nada di hasi ku kuido. Nos trahadónan a demostrá na Den Haag, i Actiz, ku ta e asosiashon di trahadónan den kuido, ku nos tambe ta afiliá né, ta sinta na mesa ku polítikonan. Pero ta di warda te ora ku waf bira e barku—òf te ora ku polítika lant’ariba. Pasobra algu tin ku kambia, no por sigui asin’aki mas. E sosiedat partisipadó, kaminda hende ta keda biba mas tantu riba nan mes ku yudansa di amistatnan i famia, ta zona bunita, pero e ta algu pa spar sèn. Yunnan di 75+ mester, huntu ku boluntarionan, kuida pa mayornan ku ta bai hasi nobenta aña. Esei por hiba na duna remedi robes, trato robes i tardi òf tempran un hende ta bai muri na Hulanda dor di e kuido aki.’ Koeweiden ta hasi un moveshon ku su man ku ta indiká kiko e ta pensa di esaki: ko’i loko. I preokupante tambe, pasobra problemanan ku ta presentá na Vredenoord, ta bin pa e atendé. ‘Tur esakinan ta pertenesé na e partinan negativo di mi trabou.’
Finansieramente na òrdu
Ultimo desaroyonan den kuido ta pone kasnan di kuido manera Vredenoord dilanti gran desafionan den e trabou diario, pero tambe riba tereno finansiero. Koeweiden: ‘Seguro médiko i kantornan di kuido tin sufisiente presupuesto, pero tin basta aña nan no ta pagando e tarifa ku tin mester pa duna kuido na ansianonan. Si no kambia esei, e ta manda e kuido di grandinan mas atras.’
Tras di telon di Vredenoord a traha duru un ten na un fushon pa alkansá oumento den eskala i un posishon finansiero mas mihó. Ora ku e fushon tabata kasi kla, tòg a posponé esaki. ‘Esaki no a laga nos sinti bon’, Koeweiden ta bisa desisivo. ‘Nos no tabatin konfiansa mas den e direktor, i tabata teme ku nos filosofia no por a keda vigente mas denter di un organisashon ku a uni ku otro. Di aplasá a bini ahustamentu, pasobra na febrüari 2016 e kantor di kuido a haña ku e sifranan di Vredenoord tabata sufisiente promisorio pa sigui riba su mes. Esei mester ta asina, Koeweiden ta pensa, ken ta remarká ku Vredenoord hopi biaha ta drai muchu mas mihó ku otronan kasnan idéntiko. ‘Nos accountant ta haña ku nos ta drai mas ku riba promedio. Na prinsipio nos tabata lucha ku un kapital negativo, pero nos finansanan ta laga mira ku tin un subida. Nos no tin kupo habrí. Mi ta sumamente kontentu ku nos a sali for di sifranan kòrá i ku a pèrmití nos pa sigui drai tòg independientemente komo kas chikí . Kon por ta posibel ku semper nos ta logra pasa dor? Nos ta un tipo di koredó di maratòn ku bes tras bes ta logra yega finish line, ounke e ta pusha te na último riba su delaster forsa.’
Distinguí
Vredenoord ta distinguí su mes for di otro kasnan, no solamente pa motibu ku e finansanan ta basta na òrdu. E ambiente ta tambe kaluroso. Tantu e habitantenan i trahadónan i boluntarionan ta hari hopi, i ta importante pa tin amor un pa otro. ‘Nos ta traha ku e pensamentu atventista. Nos ta stima Dios i nos próhimo meskos ku nos mes. Realmente nos ta duna atenshon na hende. E forsa ku nos tin, nos ta us’é pa e hendenan. Nos no tin direktornan sintá tras di lésenar den kantor, no, esnan na kabes ta traha huntu den e timnan. Nan ta sinti pa e trahadónan i e habitantenan, i esei ta bon pa e kalidat di kuido.’
Kalidat ta desmostrá su mes tambe den e alimentunan, pasobra ta importante kushiná kuminda fresku, Koeweiden ta haña. E sentro di kuido ta duna tambe atenshon na e kuminda spiritual, den forma di devoshonnan matutino i atardi, sabat skol djabièrnè anochi, i un kulto divino djasabra mainta. I klaro ta hasi orashon promé ku bai kome. ‘Mayoria di e hendenan ta kreyente i ta kontentu ku e atenshon ku nos ta duna na religion.’
Hendrik Groen
Paula Koeweiden mes lo deseá di bai Vredenoord, komo último parada den e bida terenal aki? ‘Mi por haña esei difísil awor, pasobra mi konosé tur hende’, e ta bisa. ‘Pero probablemente ta dura binti aña ainda promé ku mi tin ku hasi esei. Mi ta preferá keda kas, pero si esei no ta posibel, mi ke bai Vredenoord i niun otro kaminda.’
A puntr’é esaki, i el a respondé ku e no a lesa e buki ainda E diario sekreto (Het geheime dagboek) di Hendrik Groen, ku ta un hende ansiano di Amsterdam ku ta konta ku asina hopi smak di su bida diario den un kas di ansiano. ‘Semper mi ta okupá ku mi literatura obligatorio di mi aria di trabou.’ E fanátikonan di Hendrik Groen siguramente lo suspirá awor ku e mener aki su empeño pa logra algu ainda di bida, siguramente ta pertenesé na literatura obligatorio di funshon, di konseho di atministrashon den kuido, i di en realidat tur hende.
Vredenoord
Sentro di kuido i bibienda Vredenoord na Huis ter Heide ta ofresé lugá di biba, kuido i bienestar, konforme pregunta i deseo di su habitantenan. E kuido aki ta wòrdu duna for di un punto di bista protestant kristian i espesialmente for di e vishon di bida di iglesia Atventista. E grupo di enfoke di Vredenoord ta konsistí di ansianonan ku ta atventista, i ansianonan ku ta sinti nan yamá òf tin rèspèt pa e norma i prinsipionan ku ta enserá e estilo di bida aki.
E sentro tin komo shen habitante. E 42 apartamentunan di Intermezzo, pa aproksimadamente 56 hende, ofishalmente no ta propiedat di Vredenoord, pero di un instituto di konstrukshon di bibienda. Vredenoord ta esun si ku ta atendé e lista di espera. Tin un prohibishon general den tur edifisio di Vredenoord kontra humamentu, i esaki ta konta pa Intermezzo tambe.
Traha na Vredenoord
Hobennan ku tin smak pa traha den un karera di kuido, òf hende ku ke sigui edukashon den e direkshon aki, ta bon bini na Vredenoord. E sentro di kuido aki tin lugá di trabou pa enfermeronan 4, esnan den kuido 3IG i guia di esnan ku ta biba den e sentro. Bo a studia pa esaki, òf bo ke bai studia pa esaki? Wak pa mas informashon na www.vredenoord.nl, òf tuma kontakto ku Paula Koeweiden via (030) 693 1665 òf info@vredenoord.nl.
