E Hunta General no t’ei mas. Esun ku a sigui’é, e Hunta di Union, yamá e Komishon Nashonal, a kuminsá despues di e kongreso di mei, di mes un aña aki, pa un periodo di gobernashon di sinku aña. E miembronan lo presentá nan mes na bo riba e páginanan aki.
MIRANDA BROEKHUIS
Miranda Broekhuis ta traha parttime den iglesia Atventista komo pastor asosiá di e kongregashon di Meppel. Te poko tempu ei e tabata tambe sekretaria di e iglesia di Nort. E ta biba na Jellum, e ta kasá ku Marius i ta mama di un yu hòmber i un yu muhé adulto.
Ku mi eksperensia den aria di maneho mi ta atendé interogashonnan semper ku un aktitut di por duna servisio. Ta un aktitut ku por promové unidat di iglesia, pasobra bo ta pone e otro persona sentral. Mi partisipashon tambe komo miembro di e Komishon Nashonal mi ta tum’é di mes un forma.
Mi estímulo mas grandi den e funshon aki ta pa laga iglesia bira un movementu atrobe, kaminda tur forma di pensa den atventismo por haña nan lugá. Esaki por sosodé solamente dor di keda den komunikashon ku otro i profundisá bo mes den e otro. Na e momentu aki nos ta para na un fase di transishon. E kambionan mester hiba na tur nivel na un iglesia saludabel. E desafio mas grandi ta pa haña un balansa entre e asuntunan funshonal di iglesia i kreensia.
MADELON COMVALIUS
Madelon Comvalius- Duijster ta kasá ku Machlon. Huntu, nan tin dos yu, Jordan i Jaylisa. E ta traha na kabes di e departamentunan di Hubentut i Famia na e Kantor Nashonal di nos iglesia.
‘Den e Komishon Nashonal ta pèrmití pa mi representá e departamentu di Hobennan i Famia. Tantu na nivel nashonal komo den e iglesia lokal ta hopi importante pa pone atenshon na i duna espasio na nos hobennan den iglesia. E reto mas grandi di e komishon ta pa duna tur departamentu sufisiente atenshon.
Mi so no por perkurá pa unidat den iglesia, pa esei nos tin mester di otro! Mi ta spera di por konsientisá kada un ku tin un enkargo i kada miembro di iglesia ku tur hende, pa na nan mes manera, tin un eksperensia di fe. I esei ta bon. Nos mester duna otro espasio pa esei’.
DS. JACOB ENGELGEER
Ds. Jacob Engelgeer ta kasá ku Anneke Bekius i ta tata di dos yu adulto, Daphne i Jonathan. Mientrastantu e tin 25 aña trahando pa iglesia den diferente funshon. For di yüni e ta kabes di departamentu di Desaroyo Personal.
‘Mi tarea den e Komishon Nashonal ta konektá ku mi yamada. I mi motivashon ta mésun ku ta motivá mi aseptá e yamada ei: e tin un konekshon di formashon i unu pastoral. Esei ta e kombinashon ideal pa mi. Den mi komishon mi ke for di mi departamentu duna forma na e gobernashon di iglesia Atventista na Hulanda. Mi tin hopi gana alkansá pa hende wòrdu alimentá, formá i ekipá den nan kresementu na imágen di Dios.
Ku iglesia ta polarisá, ta hasi mi tristu. Polarisá ta bai kontra eksistensia di iglesia i ta hasi daño na nos kredibilidat. Mi ta mira ku unidat entre nos ta tambe un di e retonan di mas grandi. Den diálogo ku otro nos mester traha riba konfiansa, pa nos por progresá. Dor di keda komuniká nos por traha na unidat. Mi ta sinti mi mes inspirá den esei dor di e palabranan di Hesus den e orashon di Sumosaserdote: ‘Laga nan tur ta ún.’
RICHARD ESENKBRINK
Richard Esenkbrink ta traha komo senior akountmènedjer. E ta konsehá su klientenan tokante atkisishon i implementashon di paña pa kompania i medionan personal di protekshon. E ta kasá ku Marianne, i ta tata di tres yu i opa.
‘Ku Dios tin tempu i futuro den su man, esei ta motivá mi pa tuma asiento den e Komishon Nashonal. Dios ta yama bo. E konosé bo. E sabi kiko bo tin mester. Komo individuo bo ta djis un parti chiki di e tim. Diferente karakter ta perkurá pa kreatividat. Iglesia por spera ku lo mi usa mi kreatividat i konosementu pa bienestar di e iglesia.
Mi no ta sinti ku miembresia den e Komishon Nashonal ta un desafio, i mi no ta mira e funshon ei asina tampoko. Nos ta traha huntu pa trese unidat. Kon nos ta bai duna kada hende espasio den esaki, ta un pregunta i tarea interesante pa tur hende den nos bunita iglesia.’
CHRISTEL GOSSENS
Christel Gossens tin eksperensia amplio na nivel di gerensia den komèrsio. Na e momentu aki e ta hasiendo trabou boluntario. E ta biba na Hoensbroek i ta un biuda.
‘Ora bo ta miembro di un organisashon, bo tin ku tuma bo responsabilidat ora pidi bo partisi-pashon. Mi motivashon pa asepta bira parti di e Komishon Nashonal ta wòrdu nutrí dor di mi kreensia i amor pa Dios i Su yunan. Mi tin gana, pa komo un organisashon di iglesia, nos por stablesé un struktura di maneho funshonabel pa futuro.
Mi desafio mas grandi ta pa operá den kuadro i responsabilidatnan di un miembro di komishon. Pero tambe ku nos tin hopi poko informashon i transferensia di tur loke ta sosode den e organisashon na diferente nivel, pa por hasi esei efisientemente for di prinsipio. Traha pa tin unidat ta asuntu di e individuo. Tur miembro ta envolví den esaki, aktivo i pasivo. Mi deseo ta pa tin mas komprenshon pa otro su kreensia personal. Ningun hende tin mag di fòrsa un otro hende aseptá su kreensia i di ningun forma niun hende no mester huzga un otro hende.
MUCO DE JONGH
Muco de Jongh ta traha komo kontroladó serka Konseho pa Protekshon di Mucha. E ta kasá ku José, i huntu nan tin kuater yu.
‘Mi ta aktivo den huntanan lokal i nashonal i mi ta lesa hopi di desaroyonan di iglesia riba diferente website ofisial i independiente. Pa e motibu ei mi sabi kiko ta pasando entre miembronan i esnan ku ta na kabes. Mi ta spera di por usa e konosementu i eksperensia aki den forma konstruktivo pa mishon di nos iglesia. Esaki ta orientá riba proklamashon di e evangelio den un komunidat postmoderno i sekular, pero tin hopi di hasi tambe ku ekipá nos mes miembronan di iglesia.
E gran desafio di e funshon aki pa mi ta pa promové unidat den e diverso kreensianan ku tin den komunidat. Pa e motibu ei mi ta mira nos iglesia espesialmente komo un famia kaminda e miembronan huntu ta aportá na e mishon ei, anto ta hasi esei den un diálogo respetuoso.’
JESSICA KNOPPER
Jessica Knopper-Koning ta kasá i mama di dos tinéger. E ta lider di proyekto den Hòspital Wilhelmina na Assen, tambe ansiano na igesia di Groningen i boluntario den hunta di diverso klupnan di siklismo i eventonan di KNWU.
‘Mi ta sinti kontentu ku mi por usa mi kualidatnan, ku mi ta aportá kuné den bida diario, tambe den bida di iglesia. Esaki ta motivá mi pa aseptá tuma parti den e Komishon Nashonal. Iglesia por spera di mi ku, bou di guia di Dios, mi lo duna 100% di mi talentonan i kapasidat pa bienestar di iglesia.’ Pa laga otronan mira ku, pa ta iglesia na nivel nashonal tin tambe di hasi ku asuntunan komersial. I esaki ta un desafio pa mi. Bou di Dios Su guia stabilidat finansiero i ser iglesia, por funshoná. Pa mi unidat ta diversidat. Dor di duna tur hende espasio den sierto límite i palabrashon, nos por krese.’
Ds. BERT NAB
Ds. Bert Nab ta kasá ku Sandra i ta tata di tres yu adulto. Mientrastantu e ta trahando kaba pa 28 aña den diverso funshon pa iglesia.
‘Mi funshon resien komo presidente di distrito Sùit, ta rekerí pa mi ta miembro di e Komishon Nashonal. Funshon di e presidente di distrito den su forma aktual ta algu nobo pa mi. Den tur forma mi ke traha pa forma un tim kolegial positivo. Mi ta spera ku nos huntu ku e iglesianan di distrito por uni, i duna aporte positivo na maneho di iglesia nashonal. E desafio mas grandi di e funshon aki ta e gran kantidat di diversidat ku tin den iglesia, no kultural na promé lugá, pero espesialmente den e forma di pensa teológikamente. Ta kon nos ta ban perkurá pa tin unidat den un iglesia ku ta asina diverso, ta pa mi un desafio.’
DS. DWIGHT VAN OMMEREN
Ds. Dwight van Ommeren ta pastor, presidente di distrito Nort i ademas di esei e ta studiante di un master den Liderasgo. E ta kasá ku Andra i ta tata di tres yu.
Loke ta motivá mi pa bira parti di e Hunta Nashonal ta ku mi por aportá na e vishon i maneho di futuro di iglesia na Hulanda. Mi ke hasi mi máksimo pa yuda tin un bon koperashon entre e Komishon Nashonal, entre e pastornan i e iglesianan, proklamando Dios Su amor. Tur mi talentonan i konosementu ku mi a haña di Dios, mi ke aportá kuné na esaki.
Nos iglesia ta situá den un komunidat kompliká. Pa manehá nos iglesia ta un desafio grandi. Bou di guiansa di Dios mi ke kumpli ku pashon mi ròl den konektá hende ku otro. Pa esei mester di koperashon di tur hende.’
COLVIN OVERDIEP
Colvin Overdiep, nasé na Surnam, ta biba na Hulanda for di 1975. E tabata empleá komo dosente di siensianan sosial na Hogeschool Inholland, na Rotterdam. For di mei 2015 e ta ku prépenshun. Overdiep ta kasá ku Jane Lie Sam Foek, huntu nan tin dos yu hòmber i sinku nieta. E ta biba na Spijkenisse i einan e ta ansiano for di 1987.
‘E último desaroyonan den nos iglesia, meskos tambe e diskushon tokante posishon di hende muhé, asuntunan etiko i moral i kurso di iglesia, tin mi atenshon. Pa mi ta un desafio pa huntu ku otronan stür iglesia den e direkshon korekto. Esaki ta motivá mi pa aseptá tuma parti komo miembro di e Komishon Nashonal.
Ta mi intenshon pa pone nos miembresia sentral den sosiedat, i enfoká ménos riba ‘ser iglesia’. Nos mester perkurá pa nos bira atrobe e movementu Adventista; pa keda riba e bon kaminda i espesialmente pa fiha nos mes riba Señor di e iglesia!
Nos mester aseptá diversidat: e ta un regalu di Dios. Esei ta nifiká: keda den diálogo, duna otro espasio i respetá otro, sin laga e prinsipionan di Beibel lòs.’
ROZITA PANNEFLEK
Rozita Panneflek ta traha komo mènedjer finansiero. Ademas di esei e tin un kompania propio. E ta kasá ku Frensly i huntu nan tin tres yu: Timothy, Jonathan i Faith.
‘Konstruí na un iglesia ku ta hogar pa tur hende, no importa e diversidat. Esaki ta motivá mi pa partisipá komo miembro di e Komishon Nashonal. Loke mi ke alkansá ta pa iglesia, na diferente nivel (finansiero, kualitativo i kuantitativo) ta saludabel, i pa polarisashon no oumentá den iglesia. For di mi ekspertisio mi ta bai sigui e finansanan djaserka i duna konseho pa mehoramentu.
WILLEM VAN RHENEN
Willem van Rhenen ta dòkter di kompania, miembro di Hunta di ArboNed i dosente di Inspirashon i Produktividat na Nyenrode. E ta kasá ku Lydia Bosma i ta tata di dos yu hòmber adulto i dos nuera. E ta sinta den e Komishon Nashonal na nòmber di ADRA.
‘Ta mi soño pa hasi e Reino di Dios visibel akinan riba tera. Instrumèntnan importante pa esaki ta e testimonio di Hesu-Kristu i e bunita mensahe atventista. Iglesia por spera di mi tambe ku lo mi usa e instrumentonan aki kaminda tin mester. Esaki mi por hasi solamente ku yudansa di Dios Su Santu Spiritu. Ku lo yuda nos kada un hasi esfuerso pa yuda nos kasá i yunan, nos otro famianan, nos rumannan hòmber i ruman muhé di misa, nos bisiñanan i amistatnan i tur otro hende ku nos topa diariamente.’
BERRY QUAK
Berry Quak for di Ouderkerk aan den Ijssel ta bai misa na Rotterdam-Noord. E ta kasá di Anja i tata di tres yu hòmber. E ta traha den servisio finansiero i ta disfrutá na e momentu aki di un sabátiko.
‘Den e último dos añanan mi tabata den e hunta di distrito di Sùit. Nos lema tabata ‘Trese Huntu + Konstruí Huntu = Kresementu Huntu.’ Reakshonnan ku nos a risibí for di miembronan di iglesia pa e lema aki tabata positivo. Mi ta kere ku e trabou di iglesia mester tuma lugar netamente den e misanan. Mi deseo ta ku nos por ta un iglesia kresiente ku tur nos diversidat, tantu kualitativo i tambe kuantitativo. Mi ke yuda realisá un esfera habrí i ku gusto mi ta kòmbersá ku tur hende pa por representá bos di e miembronan den e Komishon Nashonal.
Mi desafio di mas grandi ta pa perkurá pa tur hende sinti su mes konfiabel i sigur den iglesia. Un iglesia kaminda nos ta respetá e forma diferente ku kada un ta i hasi bon uso di esei. Mi ke duna mi aporte na esei. Komo hunta nos mester duna espasio na miembronan di e hunta lokal, i mi ke keda rekordá e Komishon Nashonal di esaki. Asina nos ta perkurá pa tin unidat den un iglesia diversifiká. Mi ta konvensí ku esaki ta realmente posibel bou di guia di Dios.
Den e páginanan aki falta Christel van Maarsseveen
