Mayoria hende ta buska un iglesia promé i despues nan ta laga batisá nan mes. Anne den Hollander a hasi kontrali. Ta despues di su boutismo el a kuminsá krese den fe—i a bin haña ademas un iglesia. ‘Mi boutismo no tabata un punto di kulminashon, e tabata hustamente e komienso.’
Teksto Lydia Lijkendijk
E ta den di tres aña di un estudio pa hotelero. Otro aña e ta kla. Fuera di su estudio e ta traha abundantemente na un restorant na Breda, e lugá kaminda e ta biba. Anne den Hollander (22) ta konvensí di e estudio ku el a skohe i e ta gusta su trabou. ‘Mi ta haña hopi dushi pa atendé ku hende. Mi gusta traha den horeka, semper algu ta sosodé.’
Yu di pastor
Anne den Hollander ta bini for di un famia atventista. Su tata ta un pastor i ta traha pa iglesia atventista. ‘Tabata okei pa lanta den un famia pastoral’, e ta bisa. ‘Ounke klaro mi no tin idea kon otro e tabata. Nos tabata selebrá sabat i semper nos tabata bai misa. Dios tabata un punto sentral. Banda di esei mi tabatin gewoon un bida. Mi tabata bai skol i hunga ku mi amiguitanan. Pero mi tabata haña e teoria básiko di iglesia. Iglesia atventista ta mas ku sirbishinan riba sabat mainta, e ta henter un organisashon.’
Batisá na laman
Ku e tabata un kreyente, e tabata sabi esei semper profundo den su ser. ‘Tempu mi tabatin djesdos aña mi a bin kansa ku iglesia, mi no tabatin masha smak mas den dje. Mi tabatin difikultat ku e manera antikuá kon algun hende tabata atendé ku nan fe i ke pusha esaki riba otronan. Esaki tabata un lucha pa mi, pasobra mi tabata sabi ku mi tabata kere, pero no kon hasi esaki. Den tur loke mi tabata hasi, mi tabatin e sintimentu si ku mi fe tabata fortalesé mi hopi. Mi a pensa largu riba kiko i kon mi tabata kere i p’esei mi a boutisá aña pasá. No den misa, pasobra mi no tabatin relashon kuné, pero gewoon den laman. Dor di mi tata.’ E mester a biaha mitar mundu pa bin hasi e boutismo ei, pasobra su yu muhé a laga sa ku e ke boutisá tempu e tabata kore stage na Thailandia. ‘Mi a tende di hendenan ku tabata wòrdu boutisá den laman i mi tambe tabata ke esei’, e ta bisa. ‘E tabata parse mi gewoon un bon idea. Mi tabata kla p’e i mi tabata haña Thailandia un lugá hopi bunita. Asina, mi a tuma mi desishon. Na un momentu asina ta oportuno ku mi tata ta un pastor!’
Orashon kant’i playa
Pastor Jurriën den Hollander i su esposa Renée tabatin planiá kaba pa bai bishitá Anne na Thailandia, i awor nan a pone paña di boutismo tambe den nan ekipahe. “Nos a hasi’é un dia speshal’, Anne ta bisa. ‘Riba skuter nos a kore bai na un bunita lugá. Kant’i awa nos a hasi orashon, nos a kana bai den laman, anto papa a boutisá mi. Esaki tabata emoshonal i e tabata pas tambe. Pero e tabata djis awa. Angelnan no a bini for di shelu i nada mágiko no a pasa. E tabata djis normal.’
Su boutismo tabata un suseso bunita, e ta wak bèk riba un dushi dia. ‘Tabata straño ku no tabatin niun misa envolví, pero mi a bin kai ariba mas despues. Na sierto momentu mi a kuminsá haña falta di un iglesia. E ora ei mi a resa ku mi ke un iglesia tambe.’ Anto e ora ei si algu mágiko a sosode. Kontesta for di shelu? ‘Mas o ménos’, e ta bisa.
Anne ta bai misa
Un djabièrnè Anne a bai sali. El a bin bèk te lat. ‘Banda di kuat’or e tabata drumi riba kama. El a bula lanta ariba banda di shet’or di mainta. Mi tabatin e sintimentu fuerte: “Mi ta bai misa.” Esei tabata straño, pasobra normalmente lo mi a keda drumi un par di ora mas. Pero awor mi tabata kla kla lantá. M’a lanta wak riba internèt na unda tin un misa den mi bisindario. Tabata na Breda- Prinsenbeek. Mi a buska e ruta i a bai misa. For di e dia ei mi no a stòp ku esei. E ta un dushi iglesia ku hende hopi kariñoso. Un kongregashon chiki, kaluroso. Semper mi ta bon bini i mi ta sinti mi na kas.’
Sabat komo momentu di deskanso
Awor Anne den Hollander ta no solamente boutisá, pero e ta bai misa tambe. ‘No, mi no a pensa riba esaki for di prome, pero el a sali mi di bon. Mi ta gust’é. Mi ta komprondé awor e balor añadí di un kongregashon di iglesia. Esaki ta mustra ku mi tambe ta pertenesé einan. Awor ku mi ta mas grandi, mi por dor di mi fondo komo yu di pastor, relashoná i komprondé kosnan mas mihó ora algu no muchu bon pasa; iglesia no ta perfekto.
Dor di su trabou i bida den horeka e ta hopi biaha na trabou den wikènt. ‘Loke ta konserní tempu no ta kai bon pa bai misa. Pero mi ta sinti mas deskansá i bon ora mi bai misa, ku ora mi falta un siman. Sabat mainta ta realmente un momentu di deskanso pa mi.’
Niun pamfleta
Komo hoben ku ta kontentu ku su fe i misa ku el a skohe, Anne ta realisá ku iglesia no por forsa hobennan ku esei. ‘Henter e anunsiamentu di e evangelio, e no ta funshoná. No tin sentido pa bisa hobennan: “Bo konosé Hesus kaba?” Pasobra klaro nan sabi ken Hesus ta anto E no ta bon mirá serka nan. Ta stima mester stima hende, dor di henter nos bida. Ami mes ta tene mi religion serka mi mes. Mi no ta fòrs’é riba niun hende i mi no ta kana parti pamfleta. Pero poko tempu pasa ora mi a sali, mi a bin topa un hende ku tabatin problema. Mi a bai kuné pafó pa nos kòmbersá. El a puntra mi di kon mi ta hasi esei, anto e ora ei mi a bisa: “Mi ta un atventista, i ta pas pa hasi esei”. Despues el a tuma kontakto ku mi pa nos sigui kòmbersá un tiki mas bebiendo un kòpi kòfi. El a puntra si algun dia e tin mag di bai misa ku mi. Pa mi esaki ta un muestra ku Spiritu Santu ta move den forma asombroso, i por traha dor di un gesto chikitu den kurason di hende. Mi ta kere ku bo por interesá hobennan di e forma aki den religion: no sera bo kurpa den misa, pero bira parti di e mundu normal, bai meimei di e hendenan.’
Boutismo komo komienso
Anne den Hollander: ‘Pa wòrdu boutisá, bo’n tin mester di ta un atventista perfekto—apart di e echo ku mi ta kere fuertemente ku no tin niun atventista perfekto. Bo por ta bo mes i esei ta wòrdu aseptá. Otro hende nunka tin pakiko bisa mi ku mi ta un atventista i kiko esaki ta enserá. Mi sabi kiko ke men pa ta un atventista. Mi no ta duda den Dios òf di mi fe. Mi boutismo no tabata punto final pa mi, pero djis e komienso. Ta despues di mi boutismo mi a kuminsá krese realmente den mi fe. E prosesonan den mi kurason i spiritu ta sigui gewoon.’
Dit artikel werd gepubliceerd in Advent 3, 2016. Er is ook een Engelse vertaling beschikbaar.
